Nagapanawagan ang miyembro sang tricycle association sa Barangay Handumanan, Bacolod City sa mga otoridad sa syudad sang Bacolod nga maghimo man sang tikang agud nga maproteksyunan ang mga ini batok sa mga nagabiyahe sang colorum kag mga e-bike.
Sa interview sang Bombo Radyo Bacolod kay Ricky Duragos, masakit na para sa ila ang ginahimo sang mga colorum nga nagabiyahe bisan wala lisensya kag madata man ang nagabiyahe nga mga e-bikes kun sa diin wala na sila sang makuha nga pasahero.
Suno kay Duragos, dapat nga magahimo na sang tikang ang mga Bacolod Traffic Authority Office (BTAO) kag mga kapulisan sa syudad sang Bacolod bangud may yara na sila sang formal complaint kag nagabayad man sila sang permit kag lisensya sa Barangay kag sa Land Transportation Office (LTO).
Suno diri, indi patas ang ginahimo sang mga colorum nga nagabiyahe bangud wala na ang mga ini sang makuha nga pasahero kag haluson na sila makaincome agud may dal-on sa ila pamilya.
Ginpahayag man sini nga 350 sila tanan nga miyembro sang ila asosasyon apang ang iban nangita nalang sang iban nga palangabuhian bangud sa ila ginapangatubang nga problema.
Suno kay Duragos, nagpatigayon sila sang untat biyahe bangud luyag nila nga mahatagan man sila sang pagtamod kag mahatagan sang solusyon ang ila nga problema.
Ginkompirmar man sini nga may yara na man sang mga kapulisan kag BTAO nga nagapanakop sang mga colorum nga nagabiyahe sa Barangay Handumanan.
