Trahedya ang gindangatan sang isa ka pamilya nga gikan sa pamalayi sang nadulaan sang preno ang ginasakyan nga mini canter samtang papauli sa ciudad sang San Carlos kahapon sang hapon.
Patay ang tatlo sa kapin 20 ka sakay sang mini canter nga gikan sa banwa sang Calatrava sang nadulaan sang preno ang salakyan kag nahulog sa pil-as nga nagderetso sa suba sa Brgy. Codcod, San Carlos.
Sa pagpakig-angot sang Bombo Radyo Bacolod sa traffic investigator sang San Carlos City Police Station nga si Police Master Sergeant Joniber Sapanta, ginamaneho ni Rolanda Amaca ang truck sang ini ang naaksidente pasado alas-4:00 sang hapon.
15 sa mga sakay sini ang napilasan, anom ang gin-admit sa hospital kag patay naman ang tatlo ka mga babayi nga ginkilala nga sanday Jenalyn Lubrido Capriano, 40-anyos; Maricel Dalmacio Lubrido; kag Haide Cantoy Lubrido-53.
Upod man sa mga napilasan ang pila ka menor de edad.
Sa karun yara na sa paghinakop sang San Carlos police ang driver sang truck.
Samtang, maswerte naman nga wala nakaupod sa truck ang groom-to- be nga si Weljun Balbuena bangud nagpabilin ini sa balay sang iya kahagugma.
Apang sang nahibaluan sini ang aksidente, gilayon man ini nga nagpadulong sa San Carlos.
