Nasapwan ang gina-alegar tul-an sang duha ka tuig nga bata nga namissing sa paglaslas sang Bagyo Tino sa Hacienda Taborda, Brgy. Robles, La Castellana, Negros Occidental sang Martes, Enero 13.
Sa interview sang Bombo Radyo kay Police Captain Jose Michael Muñez, hepe sang La Castellana Municipal Police Station, pasado alas-5:00 sang hapon sang nabaton nila ang tawag gikan kay Dennis Rebulante, residente sa lugar.
Suno diri, nakita ni Rebulante ang iya nga cord sang electric drill nga nakalubong sa duta.
Sa pagbutong sini didto naggwa ang bagul sang tawo.
Gilayon nga nagresponde ang personnel sang La Castellana Municipal Police Station kag didto natukiban ang tul-an sang bata kag ang bayu nga nabilin pa sa duta.
Positibo naman nga nakilal-an sang iloy ang iya bata bangud sa panapton, nga amo ang ginsuksok sang bata sang gin-anod ini sang baha sang Nobyembre 4, 2025.
Suno kay Muñez, ang mga narecover nga tul-an ang ipaidalom sa post mortem examination agud maproseso na ang pagpalubong.
