Gilayon nga ginrelease sang mga kapulisan ang isa ka Ukranian nga mekaniko sang barko nga magapalugdang kuntani sa luxury yacht sang nga iya Russian boss matapos mag-eksplikar sang iya rasun.
Gintilawan sang 55 anyos nga lalaki nga palugdangon ang 5 million pounds vessel ukon kapin P350 million sa Port Adriano sa Majorca kun sa diin ginpahayag sini matapos nga makagwa nga wala niya ginhinulsulan ang iya nga ginhimo kag liwat pa ini nga pagahimuon.
Ang lalaki ang nagatrabaho bilang isa ka mechanic engineer sang barko nga Lady Anastasia sa sulod na sang napulo ka tuig.
Ginapahayag nga gintinguhaan sini nga palugdangon ang barko bilang pagtimalos sa tag-iya sang barko nga Alexander Mijeev nga nagakapot sang mataas nga posisyon sa Russian state company nga nagahuman sang mga armas.
Sang mag-abot ang mga Civil Guard, gilayon naman ini nga nagsungka kag ginpaathag nga kriminal ang iya nga boss nga amo ang nagabaligya sang mga armas nga nagapatay sa karun sa mga pumuluyo sang Ukraine.
Sa statement sini sa mga otoridad, ginpahayag sang lalaki nga nagalantaw ini sang mga balita nahanungod sa gyera kag nakita sini ang cruise missile nga nag-atake sa isa ka building sa Kyiv.
Ang nasambit nga missile ang isa naman sa ginhuman sang kompanya sang iya nga boss.
Gani duha ka oras matapos makita ang balita, nagbalik ini sa barko kaupod sang plano nga ini ang gub-on.
Gindumdom pa sini nga sirad-an ang fuel valves sang Lady Anastasia agud nga indi magtuga sang polusyon.
Ang Ukranian ang nagbukas sang dako nga valve sa engine room kag kasubong man sa compartment kun sa diin nagatinir ang mga crew.
Ginsugid naman sini sa mga kaupod nga crew sang barko ang iya nga plano kag nagpasalig nga siya ang manabat sang tanan sang iya nga pagahimuon.
Ginpahayag sini sa mga crewmen nga lunsay mga Ukranian nga bayaan ang barko kag siya ang magaangkon sang tanan nga responsibilidad.
Apang gintinguhaan gihapon sang mga ini nga mapunggan ang leak upod sa mga empleyado sa port.
Santo sa report, ang yate ang partially nga naglugdang.
Sa pag-abot sang mga kapulisan gilayon man nga nag-ako ang lalaki apang siya ang madasig man nga ginrelease, apang indi pa maseguro kun ini ang magapangatubang sang kaso.
