Gindagsa sang mga aplikante ang ulihi nga adlaw sang voters registration sa isa ka mall sa ciudad sang Bacolod.
Sa interview sang Bombo Radyo kay Atty Kathrina Trinio Caña, City Election Officer, Comelec Bacolod, alas- 6:00 pa lamang sang aga may yara na sang nagalinya sa gwa sang Robinsons mall amo nga bisan alas- 8:00 pa kun tani sila macater sa mga aplikante, ginpasulod na lamang nila ang mga ini para maumpisahan na ang registration.
Suno diri, alas- 8:30 sang aga nagdangat na sa kapin 200 ang nahatagan sang queuing number apang ginalauman sini nga kapin sa 800 ang macater nila subong nga adlaw.
Suno kay Caña, may kabudlayan lamang kun kaisa sa pagcater sa mga senior citizens kag PWDs kun kulang ang dala nila nga dokumento ukon wala pa sila sang photocopy sang ila mga papeles.
Dugang pa sini, kalabanan sa mga pamatan-on ang nagparehistro apang madasig lamang bangod iban indi naman gid kinahanglan pa nga magpa-assist sa pagsulat sa mga form.
Pahayag sini mas maayo kuntani nga kumpleto na ang tanan nga dokumento sang mga aplikante bangod tubtob alas- 5:00 sang hapon lamang sila maka-cater sa registrants.
