Nagpapanaog sang Executive Order No. 28 series of 2020 si Bacolod City Mayor Evelio “Bing” Leonardia nga nagamando sa mga barangay nga tumuron kag i-kordon ang ultra risk areas sa idalom sang Enhanced Community Quarantine nga ginapatuman sa ciudad.
Nakasaad sa EO nga ang ultra risk areas ano ang mga lugar, tupad-balay ukon balay sa isa ka barangay nga may yara sang nagpositibo sa COVID-19 ukon nagtaliwan bangud sa sintomas sang COVID-19 apang wala pa nakagwa ang confirmatory test result sini.
Ang barangay ang sarang nga makatumod sang mga panimalay nga makabig bilang ultra risk areas.
Sa bulig sang City Health Office kag Philippine Nationl Police, ipaidalom ini gilayon sa complete lockdown sa sulod sang 14 ka adlaw humalin sang natumod ini sang barangay kag CHO.
Ang nasambit nga EO ang effective immediately.
Sa interview sang Bombo Radyo Bacolod kay Vice Mayor El Cid Familiaran, chairman sang inter-agency task force against coronavirus, ginpahayag sini nga nagpahanugot na ang Deparmtent of Health nga hingadlan ang mg barangay sa Bacolod nga may yara sang COVID positive patients.
Suno sa iya, ang mga nagpositibo sa balatian ang nagikan sa Barangay 4, Barangay Villamonte kag Barangay Taculing samtang gina-verify pa ang Barangay Singcang-Airport.
Gin-athag man sini nga indi sa gihapon mapagwa ang impormasyon nahanungod sa pangalan sang pasyente.
Dugang pa sini nga tinutuyo lamang sang EO nga pabal-on ang publiko agud nga mangin aware kag indi dapat magtuga sang panic.
Indi man sini luyag nga idiscriminate ang nasambit nga mga pasyente.
Samtang, nagapanawagan naman ang bise alkalde sa 35 ka iban pa nga mga persons under monitoring nga magpakig-angot sa ciudad.
Suno sa iya, dapat nga mamonitor ang mga ini apang wala na sila napangkit-an.
