Nangin matawhay kag madinalag-on ang una nga adlaw sang Brigada Eskwela 2025 sa Andres Bonifacio Elementary School (ABES) 1 sang Lunes.
Sa interview sang Bombo Radyo Bacolod kay Teacher 3 Lunel Sapotin, Brigada Eskwela coordinator sang ABES 1, gamay na lamang ang hilimuson sa ila nga eskwelahan.
Ini bangod antes paman ang week-long activitity, sila ang nakapatigayon na sang pila ka construction kag repairs sa mga pasilidad sa eskwelahan.
Panawagan ni Sapotin sa mga ginikanan kag stakeholders nga mabuligan nga mahitso ang buluthuan, agud mangin condusive sa pagtuon sang kabataan sa pagsugod sang klase sa Hunyo 16.
May-ara sang 1,243 ka mga enrollees nakaligad nga school year, kag nagalaom ang mga ini nga mas mataas ang enrollees subong nga school year 2025-2026.
Gani padayun man ang ila nga panawagan sa mga ginikanan sa nakapalibot nga Barangay sa ABES 1 nga ipa-enroll na ang ila mga kabataan.
Samtang, padayon ang monitoring sang Negros Occidental Police Provincial Office sa ginapatigayon nga Brigada Eskwela.
Sa interview sang Bombo Radyo Bacolod kay NOCPPO spokesperson Police Captain Judesses Catalogo, ang Brigada Eskwela ang ginpatigayon halin sang Lunes tubtob Biyernes may yara sang buddy system ang kapulisan kag may yara sang assistance desk nga ginbutang.
Suno diri, bangod madamo sang mga ginikanan kag kabataan ang yara sa gwa ini ang mahimo gamiton sang may malain nga katuyoan bilang oportunidad sa paghimo sang indi insakto.
