Wala nadayun ang dry run kuntani sang mga electric jeepneys sa Barangay Vista Alegre, Bacolod City subong nga adlaw, matapos ginbalabagan sang mga tricycle drivers.
Nahibaluan nga subong nga adlaw ang umpisa sang lima ka adlaw nga dry run para sa routa nga magagikan sa relocation site sa Purok Arao padulong sa Burgos Public Market.
Bangod dry run pa lamang, libre kuntani ang pagbyahe sang mga e-jeep, apang apisar nga duha na ka e-jeep ang napuno sila ang wala makalarga matapos nagbalabag ang mga tricycle drivers sa dalan.
Panindugan sang mga tricycle drivers nga sila ang madulaan sang palangabuhian sa pagsulod sang e-jeep kag sila ang nagapanindugan nga illegal ang franchise sang e-jeep.
Apisar sa madamo nga nakigbahin, nahibaluan nga anom lamang ka mga unit sang tricycle ang rehistrado sa nasambitan nga Barangay.
Personal man nga ginpadulungan ni Bacolod City Councilor Al Victor Espino, chairperson sa Committee on Transportation ang area kag nagpatigayon sang paghinun-anon upod kay Punong Barangay Leandro De Leon, TODA personnel kag representative sang e-jeep.
Paathag sang konsehal nga ang pagsulod sang e-jeep ang naglabay sa legal nga paagi.
Ini ang request naman mismo sang mga pumuluyo bangod sa mahal nga pletehan.
Aminado man si Espino nga dapat matun-an sang husto kun pila ka e-jeep unit ang maserbisyo sa lugar.
Ginpahanumdom man sini nga indi madulaan sang palangabuhian ang mga tricycle driver bangod sila gihapon ang mahatag service sa mga pumuluyo pasulod sa relocation site, kag ang e-jeep ang magahalin lamang sa terminal padulong sa Burgos Public Market.
