Ginatumod sang 303rd Infantry Brigade kun ano ang motibo sang persona nga nag-upload sang litrato kahapon nga nagapakita nga duha ka mga bata nga lalaki ang napatay kadungan sang engkwentro sa tunga sang 94th Infantry Battalion kag mga miyembro sang New People’s Army sa Sitio Sig-ang, Barangay Carabalan, ciudad sang Himamaylan kahapon.
Sa interview sang Bombo Radyo kay 303rd IB commander Brigadier General Inocencio Pasaporte, may nagcirculate nga mga litrato kahapon angot sa ginreport nga napatay apang indi ini matuod bangud wala sang narecover nga bangkay sa encounter site.
Suno kay Pasaporte, nakaandan na sang 303rd Infantry Brigade nga ginaretrieve sang mga suldado ang bangkay kag ginaturn-over sa pamilya kag ginaamutan sa pagpalubong.
Santo sa pagtrace sang tropa, isa ka opisyal sang LGU sang Himamaylan ang una nga nagpagwa sang litrato nga ginhatag sa isa ka news outlet nga amo man ang nag-upload sini.
Suno sa Army official, daw kaangay nga may effort nga patalangon ang publiko angot sa matuod nga sitwasyon.
Bangud natrace na nga opisyal sang LGU sang Himamaylan ang nagpagwa sang mga litrato, ila hibaluon kun ano ang sabat sini.
Ginpanindugan sini nga indi sa militar ang burden of proof sa pagpamatuod nga wala sang napatay kundi ang outlet nga una nagpagwa sang litrato.
Suno kay Pasaporte, lantawon nila kun ano ang mangin liability sang naghatag sang malisyoso nga litrato kag kun ano ang motibo sini.
