Wala nagpadaog sa mga kritisismo kag bullying ang Algerian female boxer nga si Imane Khelif bangud nakuha sini ang una nga Olympic gold medal sang Algeria sa women’s boxing sa Paris 2024.
Sa hampang kaina sang kaagahon, August 10, unanimous ang nangin decision sang mga judges sa tatlo ka rounds batok kay Yang Liu sang China kun sa diin sila ang naghatag sang 30-27 sa tanan nga lima ka scorecards.
Indi matakos ang kalipay ni Khelif nga nakit-an sa camera antes sini ginhakos ang iya coaches kag ginhayaw ang hayahay sang Algeria.
Wild ride ang inagyan ni Imane halin pa lang sa panugod sang iya Olympic campaign sa 66-kilogram class kun sa diin nagdaog ini sa sulod lang sang 46 segundos matapos nga nag-isol si Angela Carini sang Italy bangud sa severe pain sa iya ilong.
Nangin subject ini sang debate angot sa gender ni Khelif. Siya ang nasal-an nga transgender ukon biologically male, bangud gindisqualify ini sang International Boxing Association (IBA) sa 2023 World Championships bangud wala niya napasaran ang eligibility criteria.
Ginpamilit naman sang International Olympic Committee (IOC) nga wala sang transgender issue kanday Khelif kag Lin Yu-Ting sang Chinese Taipei bangud sila ang nagpasakop sa women’s tournaments sa sulod sang madamo na nga tinuig sa Olympics kag IBA-sanctioned contests.
Kasunod sang bashing sa iya nga ikasarang bilang boksidor, nagpagwa sang statement si Khelif nga nagasiling:
“I send a message to all the people of the world to uphold the Olympic principles, according to the Olympic Charter, to refrain from bullying all athletes because this thing has effects, massive effects. It can destroy people, it can kill people’s thoughts, spirit, and mind. And it can divide people. And because of that, I ask them to refrain from bullying, and that’s it.”
