BACOLOD CITY — Liwat nga pagatilawan sang University of St. La Salle (USLS-Bacolod) College of Law ang ila nga swerte kag kinaadman sa patigayunon nga oral rounds sang The International Law Moot Court Competition Asia Cup 2017 sa Tokyo, Japan sa maabot nga Agusto.
Sa interview sa Good Morning, Philippines Program sang Bombo Radyo Bacolod, ginpahayag ni Atty. Hanz Villaster nga nagatindog nga coach sang USLS College of Law team, masami nga nagapasakop sa moot court competitions sa pungsod kag sa luwas ang unibersidad kag nagadaog man.
Nangin madinalag-on ini sa International Humanitarian Law Moot Court Competition sadtong tuig 2007 kag 2012.
Sang nagligad lang nga tuig, isa man ang USLS sa mga nagtiglawas sang Southeast Asia sa world finals kag nangin madinalag-on.
Suno kay Atty. Villaster, nakatilaw naman sa pagpasakop ang USLS College of Law team sa Asia Cup sadtong 2008 rason nga napinsaran sini magpasakop liwat subong kag sa maayo nga palad, sila ang napilian magtiglawas sang Pilipinas.
Aminado si Villaster nga bangud yari sa probinsiya, mas maiwat ang resource materials nga sarang nila magamit kun ikumparar sa mga unibersidad sa Metro Manila apang sa gihapon nagapasalamat ini bangud sa mapisan kag maalam nga mga myembro sang team nga wala nagauntat sa pagtuon kag panalawsaw para sa moot court competition.
Daku naman ang pagpasalamat sang isa ka law student sa Debate sa Bombo sang Bombo Radyo Philippines bangud isa ini sa mga rason nga isa siya sa mga magatiglawas sang Pilipinas sa oral rounds sang The International Law Moot Court Competition Asia Cup 2017 sa Tokyo, Japan.
Suno kay Mark Steven Mayo, third year law student sang University of St. La Salle (USLS-Bacolod) kag katapo sang USLS College of Law team, daku ang pasalamatan sini sa Debate sa Bombo project sang Bombo Radyo Bacolod bangud ini ang nagdala sa iya kun sa diinman siya subong.
Suno kay Mayo, ang Debate sa Bombo nangin panugod sang pag-angkon niya sang interes sa pagpasakop sa kasubong nga mga kompetisyon.
Diri man nagsugod sa pagtubo sang iya kumpiyansa sa kaugalingon.
Apang kun sadto debate, ang pagpasakop naman sa moot court competition ang naghatag sang panibag-o nga pagpanghangkat kay Mark Steven kag iya ini ginabaton sang hugot bangud tumalagsahon ini nga kahigayunan nga nag-abot sa iya.
Nahibaluan nga sang magpasakop sa Debate sa Bombo, siya ang ginhingadlan nga Best Speaker kag Best Debater.
Kaupod sini sa USLS College of Law Team sanday Marty Go, Japheth Cua kag Jacquiline Jacob.
Indi kaangay sang debate kun sa diin may duha ka team nga nagabayluhanay sang argumento, ang moot court competition amo ang pag-atubang sang mga ini sa mga huwes nga nagatindog bilang International Court of Justice.
Ginahatagan sila sang isa ka kaso kag ila pangapinan ang pungsod nga ila ginatiglawas.
