Dako ang pasalamat sa Ginoo sang 8th placer sa bag-o lang natapos nga November 2024 Nursing Licensure Examination nga siya ang nadala sa Top 10 apisar nga makapasar lamang ang iya nga handom.
Si Mary Catherine Nakar, residente sang Kabankalan City, kag graduate naman sa University of Negros Occidental – Recolletos ang nakakuha sang 91 percent average ratings upod sa 14 ka iban pa.
Sa interview sang Bombo Radyo Bacolod kay Nakar, luyag gid lamang sini nga makapasar kag tuman man ang pag-overthink sini pag-abot sa balay sa kahangawa nga madamo ini sang sala nga sabat.
Apang dako ang pasalamat sini sa Ginoo nga wala lamang ginsabat ang iya pangamuyo nga makapasar, siya ang nalakip pa sa rank-8 sang pasinawan.
Siya ang naggradwar sa Talubangi Elementary School kag Kabankalan Catholic College sa Elementary kag Junior High School, samtang sa UNO-R na sang magtapak sa Senior High School kag College.
Sang highschool, nagapinsar ini nga mangin accountant ukon psychologist, apang sa pag-enroll sa kolehiyo, bangod madamo ini sang kaupdanan nga magakuha sang nursing, siya ang nagsunod man kag gilayon man nga ginsuportahan sang iya ginikanan.
Si Nakar ang fresh graduate kag nagsugod sa pagreview sang Hulyo.
Ini ang nagreview paagi sa Brainhub review center sa Bacolod City kag sa ila intensive review, siya ang nagasabat sang 300 questions sa isa ka adlaw.
Inspirasyon sini sa pagtuon ang pamilya, nga tuman ang investment kag pagsuporta sa iya kag pasalig sini nag indi niya uyangan ang indi pag-ampo sang iya mga ginikanan.
Ginpasalamatan man sini ang ila clinical instructors nga nagkadto sa ila sa Cebu sa adlaw antes ang pasinawan bilang pagpakita sang suporta.
Mensahe sini sa iban nga magakuha sang board exam nga ihatag ang dedikasyon, tagipusuon kag indi kalipatan ang pagpangamuyo sa Ginoo nga sila ang hatagan sang nagakaigo nga mindset.
Agud indi maburn-out, kinahanglan man nga maghatag sang tion para sa pahuway.
