Ginpahayag sang presidente sang Sentrong Samahan ng mga Tsuper at Operators Negros (SSTONE) nga ang magauntat sa pagbiyahe subong nga adlaw sang Lunes amo ang mga driver nga nagamaneho sang traditional jeepneys nga indi kumpleto ang papeles kasunod sang nadesisyunan nila sa meeting kahapon, Nobyembre 6.
Sa interview sang Bombo Radyo Bacolod kay Albert Villanueva, nagpatigayon sang emergency meeting kahapon ang mga drivers kag operators sa idalom sang SSTONE, FEBACDA kag iban pa nga mga nagapanag-iya sang traditional jeepney.
Suno kay Villanueva, gindesisyunan sang grupo nga maga-untat sa pagbiyahe buwas nga adlaw ang mga wala sang kumpleto nga papeles bangod sa gin-alegar plano sang LTO kag BTAO nga magapatigayon sang massive apprehension sa mga tradisyunal nga salakyan.
Suno pa diri, nakabaton ini sang impormasyon kasubong man ang iban pa nga mga operators kag ginalegar sini nga nagpakigsapol tinalikdan nga Hwebes (Nov. 3) si LTFRB Regional Director Richard Osmenna sa mga operators sang modernized jeepney upod si BTAO Head Police Major Junji Liba kag ginpamatian ang reklamo sang mga nagapanagiya sang modernized unit nga suno sa ila manubo ang income.
Ginpahayaga man sini nga ginpahibalo man sila ni BTAO Head Police Major Junji Liba nga may patigayunon nga pagpanakop subong nga adlaw sa mga indi kumpleto ang mga papeles.
Nagpagwa man sang announcements kahapon ang public information office sang Bacolod City Government kahapong nga subong nga adlaw, Lunes, Nobyembre 7, magapatigayon sang Land Transportation Office Regional Office 6, sang checkpoints sa pila ka lugar sa bahin sang syudad sang Bacolod agud mag-usisa sang mga rehistro kag permits sang mga Public Utility Jeepneys sa syudad bilang pagpatuman sang Department of Transportation (DOTr) No. Department Order 2017-011 ukon ang polisa sang Public Utility Vehicle Modernization Program (PUVMP).
Ginakasubo sang mga ini nga ginsolusyunan sang nasambit nga ahensya ang problema sang mga nagabiyahe sang modernized jeepneys nga nagabiyahe sa syudad sang Bacolod apang panawagan sang mga traditional jeepneys nga magparehistro ang wala ginpasugtan.
Gin-aligar man ni Villanueva nga ginahimo sang LTFRB nga legal ang illegal kag illegal ginahimo nga legal bangud ang mga modernized jeepney ang rehistro ang indi for hire apang nakakuha sang prangkisa kag business permits nga magbiyahe sa syudad samtang ang traditional jeepneys ang wala na liwat ginparenew matapos nagexpire ang prangkisa.
Hulaton man sang mga ini ang resulta sang ila pakig-estorya kay Bacolod City Mayor Alfredo Benitez angot sa ila problema nga natalana sa Martes.
