BACOLOD CITY – Naka-file na si Mayor Evelio “Bing” Leonardia sang petition for temporary restraining order and injunction sa Court of Appeals kasunod sang dismissal order sang Ombudsman batok sa iya kag sa 9 pa nga ka mga anay miembro sang Bids and Awards Committee sang tuig 2008.
Sa press statement nga gin paguwa sang alkalde, gin pahayag sini nga klaro sa desisyon sang Ombudsman nga wala sang ginkawat nga gikan sa ciudad, na-deliver ang tanan nga goods nga gin bakal kag indi ini overpriced, wala sang conspiracy kag in good faith ang pagbakal sang P50 milyones nga balor sang furniture and fixtures para sa new government center.
Ginkakibot sang kampo ni Leonardia ang desisyon sang Ombudsman bangud nagdumdom ang mga ini nga sirado na ang kaso.
Nagpasalig si Leonardia nga atubangon sini ang kaso kag himuon ang tanan nga remedyo-legal.
Nagalaum naman ini nga mahatagan siya sang CA sang TRO, kag sa ulihi ma over-turn ang dismissal order sang Ombudsman kag mangin paborable sa iya ang desisyon.
Sa order nga ginpapanaog sang ombudsman sang disyembre 2 tuig 2016 nga pirmado ni ombudsman conchita carpio-morales, guilty sang grave misconduct kag gross neglect of duty bilang paglapas sa RA 3019 ukon anti-graft and corrupt practices act sanday Leonardia, secretary to the mayor Goldwyn Nifras, city budget officer Luzviminda Treyes, the late city legal officer Allan Zamora, department of public services head Nelson Sedillo kag city engineer Belly Aguillon.
Nalakip man sa kaso sanday bids and awards committee member Gliceria Caduhada, city accountant Eduardo Ravena, city engineer Aladino Agbones kag Jaries Ebenizer Encabo, BAC secretariat head Melvin Recabar kag city treasurer Annabelle Badajos.
Wala naman nalakip sa joint resolution sang liabilities sanday Atty. Zamora kag caduhada matapos nagtaliwan samtang pending ang kaso.
Ang kaso nag-ugat sa pagbakal sang malapit P50 milyones nga balor sang furniture sa COMFAC corporation sang tuig 2008 kun sa diin delayed ang pagdeliver gani utay-utay man ang pagbayad sang ciudad.
