BACOLOD CITY — Gindepensahan sang director sang Police Regional Office (PRO) 18 ang hepe sang Hinigaran Municipal Police Station nga luyag pailisan sang alkalde.
Sa interview sang Bombo Radyo, ginpahayag ni Police Chief Supt. Edmund Gonzales nga maayo ang performance ni Police Senior Inspector Gerald Lawrence Bathan humalin sang nagpungko ini nga hepe sang kapulisan sa amo nga banwa.
Siya ang ginbulos sa anay chief of police nga si Police Senior Inspector Gerald Moya nga suno kay Gonzales, indi maayo ang performance bangud wala sang halos dinakpan may angot sa iligal nga druga.
Suno kay Gonzales, nakita sang provincial director ang maayo nga kampanya ni Bathan.
Paathag sang regional director, ang ila pagkakas sa pwesto sa hepe ang nagadepende naman sa performance sini.
Gani nagapanugyan si Gonzales kay Mayor Josie Nadie Arceo nga ibutang sa papel ang reklamo batok sa ila hepe agud nga may basehan ang mga higher officials.
Nahibaluan nga nagreklamo ang alkalde bangud sa indi pagkonsulta sa iya ni Bathan antes ginpresentar sa ila Municipal Anti-Drug Abuse Council (MADAC) meeting nga wala na sa Hinigaran si Jessie Ramos, ang bigtime druglord nga duha ka dekada na nga imbolbado sa ilegal nga druga kag sa mga kaso sang pagpamatay.
Gintinguhaan sang Bombo Radyo nga makuhaan sang bahin si Bathan apang nagbalibad ini nga magpa-interview.
