Nanindugan si US President Donald Trump nga kinahanglan makuha sang Amerika ang Greenland antes paman sini akuon sang Russia kag China.
Ginhatagan pagtamod sang Presidente sang Estados Unidos ang pagdepensa sa Greenland kag nagsiling nga himuon nila ini sa bisan ano nga paagi nga kinahanglanon.
Una na nga ginpahayag sang White House nga ginakonsiderar sang Trump administration nga “baklon” ang Greenland nga kontrolado sang Denmark bilang isa ka autonomous territory, apang wala man ginabaliwala ang opsyon nga i-annex ini sa pwersahan nga pamaagi.
Ginklaro sang Denmark kag Greenland nga indi “for sale” ang amo nga teritoryo.
Nagapangandam man ang Denmark sa posible nga military action nga pagahimuon batok sa ila nga pungsod, mangin senyales ini sang pagtapos sang defense alliance nga North Atlantic Treaty Organization (NATO), nga miyembro ang US kag Denmark.
Makapila na ka beses nga ginpahayag ni Trump nga importante ang lokasyon sang Greenland para sa national security sang Amerika. Sa isa ka statement sang Biyernes, ginpahayag liwat sang mga party leaders sang Greenland upod ang oposisyon ang ila pagtutol nga mapasaidalom sa kontrol sang Amerika.
