NEW YORK CITY, USA- Nagapati ang isa ka Pinoy sa New York City, USA nga mas mangin alerto pa gid ang mga otoridad sa Amerika batok sa violence ukon pagpanakit subong nga nagpagwa sang statement ang US president nga nagakondenar sa anti-Asian hate crimes.
Kaina sang aga, nagpadulong si President Joe Biden kag Vice President Kamala Harris sa Atlanta, Georgia kasunod sang shooting sa tatlo ka spa kun sa diin walo ka mga babayi nga may Asian descent ang napatay.
Sa iya nga mensahe sa Emory University sa Atlanta, nagpanawagan si Biden nga untatan na ang anti-Asian violence bangud nagapati ini nga may mga core values kag beliefs nga magahugpong sa mga Americano.
Isa na diri suno sa US president amo ang pagpanindugan bilang Americano kag ululupod nga pagbato sa hate kag racism.
Gin-angot ni Biden ang Atlanta shooting sa naglala nga anti-Asian attacks nga nagdamo na gid sang nagdamo ang coronavirus cases sa America.
Si US Vice President Kamala Harris naman ang nagpanawagan sa mga biktima nga indi maghipos kundi manugid sa mga otoridad kun sila ang ginsakit.
Suno kay Bombo correspondent Alex Vidal nagikan sa New York City, naglala ang hate crimes sa mga Asyano sa US bangud nagapati ang pila ka Americano nga nagikan sa China ang virus.
Mangin ang indi Chinese suno kay Vidal apang singkit ang mata ang ginasakit man sang white ukon black Americans.
Ang mga biktima sang hate crimes suno kay Vidal ang ginalakipan sang Asian Americans kag Pacific Islanders lakip na ang mga Pinoy.
Bangud sa statement nanday Biden kag Harris suno sa Bombo correspondent, mas magaaligmat pa gid ang mga otoridad kag kun maghimo man sang hagna ang Kongreso angot diri, labi nga maproteksyunan ang mga Asian Americans lakip na ang mga Pilipino.
