BACOLOD CITY — Ginplastar na sang partido nga Love Negros ang ila mga plano sa probinsya sang Negros Occidental sa palaabuton nga 2019 midterm elections.
Si Abang Lingkod Partylist Representative Stephen Paduano ang ginpadala sang partido nga mag-atubang sa media agud iladlad ang plano.
Diri ginpahayag ni Cong. Paduano nga kun indi madayon ang plano ni 3rd District Congressman Albee Benitez nga magpadalagan sa pagka-gobernador si incumbent Vice Governor Eugenio Jose Lacson ang ila padalaganon.
Kun madayon man ang plano nga unification sa partido nga United Negros Alliance (UNEGA) luyag sa gihapon sang Love Negros nga sa ila magahalin ang kandidato sa pagkagobernador.
May angut sini, nagaguwa man ang tandem nga Double A ukon Albee Benitez kag Mercedez “Chedeng” Alvarez nga karun Deputy House Speaker kag Representative sang 6th District sang Negros Occidental.
Samtang, wala pa sang tul-id nga pahayag si Abang Lingkod Partylist Representative Stephen Paduano sa plano sini sa 2019 midterm elections.
Una na naguwa ang mga huring-huring nga magapadagan ini sa pagka-alkalde sang ciudad sang Bacolod sa masunod nga tuig nga eleksyon.
Apang sa pag-atubang sini sa mga katapo sang media kahapon, ginpahayag sini nga kaangay sang ginhambal ni Mayor Evelio Leonardia, magatrabaho lang anay ini bangud nga medyo madugay pa man ang eleksyon.
Ang maathag lang sa karun suno sa kongresista nga nagsaylo na siya sang iya registration gikan sa banwa sang EB Magalona padulong sa Brgy. Mandalagon sa ciudad sang Bacolod.
