Masobra sa walo ka mga tribu ang nagatinir sa minuro nga nalubong sa landslide sa northern Papua New Guinea sang Biyernes.
Sa interview sang Bombo Radyo Bacolod kay Maria Resca Regalado, Bombo International News Correspondent derekta sa Papua New Guinea, ginalantaw nga masobra 670 ang mga missing nga mahimo natampukan sang natiphag nga duta.
Sa impormasyon nga nakuha sini gikan sa native sa lugar, masobra walo ka tribu ang nagapuyo sa Kaokalam village sa Enga Province kag ang kada tribu ang may masobra isa ka gatos nga mga miyembro.
Paathag sini nga ang numero sang missing ang santo sa report sang tagsa ka mga tribu.
Pahayag ni Regalado nga ang minuro ang nahamtang sa kilid sang main road nga nagalabay sa tunga sang duha ka bukid.
Suno sa native sa lugar, sadto halos indi makita ang dalan bangod sa tuman ka damol sang kalasangan, apang sa karun wala na sang makita nga kahoy sa nasambitan nga mga bukid.
Sa masami, ang mga nagasaka sa bukid ang nagahulat naman sang adlaw tubtob magmala ang duta antes magtravel bangod sa masami naga-ulan kun hapon tubtob maggab-i, nga nagapahumok sang duta.
Bangod man sa paghumok sang duta, natiphag ang duha ka bukid kag amo ang naglubong sang minuro.
May-ara naman sang kabudlayan sa retrieval operation bangod wala sang nagakaigo nga equipment ang Papua New Guinea.
Dugang pa sini nga nakaandan sa lugar nga wala nagatrabaho kun weekend nga rasun man sa paghinay sang hulag sang retrieval kag rescue operations.
