Nadugangan pa ang numero sang ginaalegar miyembro sang New People’s Army sa Himamaylan City, Negros Occidental nga nadakpan sang kapulisan kag mga suldado paagi sa pagserbe sang warrant of arrest.
Sa interview sang Bombo Radyo Bacolod kay 62nd Infantry Battalion commander Lt. Col. Egberto Dacoscos, pito na ang nadakpan nga NPA members humalin kahapon tubtub kaina sang aga.
Pinakaulihi sa mga ini amo si Jasper Acuyong sang Barangay Buenavista, Himamaylan City nga nadakpan kaina sang aga.
Kahapon, ginserbehan sang warrant of arrest sanday Rodrigo Medes, secretary sang local party branch sang Central Negros Command; kag ang mga miyembro sang unit militia nga sanday Jimmy Teves, Judito Montecino, JP Romano, Eliseo Andres, kag Roger Sabanal nga lunsay mga residente sang Barangay Buenavista.
Suno kay Dacoscos, two counts of murder kag 6 counts of frustrated murder ang ginaatubang sang mga arestado.
Ini ang may kaangtanan sa engkwentro sa Kabankalan City sang May 2018 kun sa diin duha ka suldado ang patay kag anom ang pilason.
Sa kabug-usan, 27 ka NPA members ang ginkasuhan kag may 20 pa nga at-large.
Ang pagserbe sang warrant of arrest ang ginpatigayon sang gintingob nga pwersa sang 62nd IB kag 2nd Negros Occidental Mobile Force Company.
