Pag-amlig sa dunang-manggad ang kaundan sang ambahanon sang isa ka composer nagikan sa Tacloban City nga nakasulod sa semifinals sang 3rd Bombo Music Festival.
Suno kay Paolo Ay-ay nga isa ka home-based online worker kag composer sang ambahanon nga “Bilang Tao”, madamo ang sarang mahimo sang isa ka tawo agud maamligan ang palibot.
Ini ang labing una nga kahigayunan nga nagpasakop si Ay-ay sa song writing competition gani tuman ang kalipay sini sang nahibaluan nga nakasulod sa semifinals ang iya entry.
Siya man mismo ang interpreter sang iya ambahanon.
Ini man ang labing una nga kahigayunan nga nagcompose sang Filipino song si Ay-ay bangud sa masami, Waray ang ginahimo niya nga kanta.
Bulan sang Hunyo sang gincompose ni Ay-ay ang “Bilang Tao” agud ipasakop sa Bombo Music Festival.
Suno diri, luyag niya nga maintindihan sang tanan nga Pilipino ang mensahe sang iya kanta gani ginsulat niya ini sa Filipino.
