Nagsaka na sa 83 million liter per day ang water supply sa Bacolod City matapos may nagdugang 3 million liter kasunod sang pag-activate sang Matab-ang Water Treatment Plant sa Barangay Granada, Bacolod City.
Suno sa pahayag ni Bacolod City Mayor Alfredo “Albee” Benitez, nadelay ang activation sang nasambit nga water treatment plant bangud sa mga kinahanglanon nga papeles kaangay sang permits, right of way kag maenergized agud nga makasupply sang tubig.
Samtang sa pahayag naman sang PrimeWater-Bacolod City Water District (Baciwa), ang dugang nga three million liters per day (MLD) ang makapasanyog naman sang water supply sa 5000 ka mga konsumidor sa Barangays 27, 28, 30, Estefania, Villamonte, kag Mandalagan.
Ginpahayag man nga ang nasambit nga proyekto ang nagapakita nga nagapahimo sang tikang ang water concessionaire agud nga masolusyunan ang problema sa tubig sang ciudad.
Sa karun may yara sang ginadihon nga water injection point 2 nga kuhaon naman sa Caliban river nga ginalauman nga makasolbar sang problema sang water supply sa Barangay Mansilingan, Handumanan, Felisa, kag Alijis.
Suno sa alkalde ang ciudad sang Bacolod ang nalakip sa imbestigasyon sang Senado bangud isa ang ciudad sa nagakuha sang water supply sa Primewater.
