Sa mga kasal na, ginakakas mo man bala ang imo nga wedding ring kun ikaw ang magpaligo?
Apang napinsaran mo na bala ang posibilidad nga ini ang madula?
Kaangay sa isa ka babayi nga aksidente nga natulon ang iya wedding ring samtang nagabakasyon sa Phuket, Thailand.
Suno sa kay Dannah McMichael 39 anyus, ginkuha niya ang iya singsing antes magpaligo.
Pagkatapos sadto, nag-inom siya sang vitamins.
Pagligad sang pila ka tion, natalupangdan sini nga nadula ang iya singsing rason nga ila ini ginpangita apang wala nila makita.
Nag-joke ang iya bana nga basi gintulon niya ang singsing, tubtub nga nagdesisyon sila nga magpa-X-Ray.
Sang ginpa-X-Ray ang babaye, natukiban nga yara gid man sa sulod sang iya lawas ang singsing.
Ginlaygayan ini sang doktor nga mag-inom sang bulong agod mapaguwa sang natural ukon pinaagi sa paghigko.
Ini ang nangin madinalag-on kag nahimo nga makuha sang babaye singsing kag liwat nga nasuksok sa iya nga mga tudlo.
