Patay ang isa ka welder nga nagamaneho sang tricycle matapos nakabunggo sa truck sa national highway sa Purok Timawa, Barangay Ma-ao, Bago City, Negros Occidental, Martes sang aga, Hulyo 2.
Ginkilala ang napatay kay Willy Boy Gallego, 38 anyos kag residente sang Purok Mainuswagon, Barangay Alyansa, Bago City samtang pilason naman ang kaupod sini nga si Cyril Dave Casiano, 22 anyos kag nagatrabaho man bilang welder.
Ang tricycle ang ginagamit sang duha nga service padulong sa ila nga trabaho.
Sa interview sang Bombo Radyo Bacolod kay Police Corp. Kim Iver Cornel, traffic investigator sang Bago City Police Station, ang tricycle nga ginamaneho ni Gallego ang padulong sa Barangay Maao nagikan sa city proper sang Bago City.
Samtang ang Isuzu double decker truck nga ginakargahan sang mga motorsiklo nga ginapanag-iyahan sang Du Ek Sam kag ginamaneho ni Teodolio De Vega, 40 anyos, kasado kag residente sang Barangay Suba, Calatrava, Negros Occidental, ang nagikan naman sa Barangay Maao padulong sa city proper sang Bago City.
Nagagwa sa imbestigasyon nga gin-agaw sang tricycle ang lane sang truck gani nakabunggo ini sa kilid sang nasambit nga salakyan.
Bangud sa impact, nakaagom sang pilas sa ulo si Gallego nga ginhingagaw pa dala sa ospital apang ginbawian ini sang kabuhi samtang si Casiano ang pilason.
Suno kay Cornel, santo sa pahayag sang nakakita nga driver, magaovertake kuntani si Gallego sa kotse apang naalang-alang ini.
Temporaryo nga nakahunong sa Bago City Police Station si De Vega kag wala pa mahibaluan kun magapasaka sang kaso ang pamilya sang biktima batok sa iya.
