Ginpasakaan sang kaso sang Yanson Fantastic 4 ang ila agot nga utod nga presidente kag chief executive officer (CEO) sang Yanson Group of Bus Companies nga si Leo Rey Yanson kag ang Armored Guard Security Agency (AGNSA) samtang nagapadayon ang family feud sang mga ini.
Suno sa abogado nanday Roy, Emily, Celina kag Ricardo Jr. nga si Atty. Raul Bito-on, kaso nga grave coercion ang ginpasaka sang ila kampo batok sa AGNSA personnel nga sanday Florencio Dobrea nga AGNSA general manager, Raymond Santillan, Reynaldo Llena Jr., Harel Pelayo kag Jerold Datiles bangud sa pagsuporta sang mga ini sa “illegal orders” ni LRY.
Sa ginpasa nga affidavit nanday Vallacar Chief Financial Officer Celina Yanson-Lopez kag Board Corporate Secretary Emily Yanson sa Bacolod City Prosecutor’s Office, ginpahayag sang mga ini nga naglapas ang security agency sa layi bangud nanghilabot ang mga ini sa away sang ila pamilya.
Dugang pa sang duha ka babayi nga Yanson nga wala sila dapat ginpunggan sang AGNSA nga makasulod sa main office sang Vallacar Transit Inc. sa Barangay Mansilingan, Bacolod City sang nakaligad nga Agosto 13.
Nagpasaka man ang mga ini sang writ of mandamus sa Regional Trial Court sa Bacolod agud mapilitan sanday LRY kag ang AGNSA nga pasudlon ang Yanson 4 sa main office sang VTI.
Isa pa ka kaso para sa injunction ang ginpasaka sa korte sang nagligad nga adlaw batok kay Leo Rey agud punggan ini nga magpatawag kag magpatigayon sang Special Board Meeting sa Agosto 19.
Suno sa Yanson 4, wala sang kinamatarong si LRY nga magpagwa sang mando kag direktiba bangud wala na ini sang posisyon sa executive management team.
Kun madumduman nga ginapanindugan sang apat nga mag-ulutod nga tapos na ang termino ni Leo Rey bilang presidente sang VTI sadto pang Hulyo 7 apang nagpamalibad naman ini nga magpanaog sa pwesto bangud suno sa iya iligal ang ginhimo nga special board meeting sang iya mga utod.
Posible man nga makasuhan ang iban nga empleyado sang VTI nga nagasunod sa mando ni LRY suno sa apat.
Samtang, nagsulat naman ang iloy nila nga si Olivia Yanson sa bata sini nga si Emily nga pahalinon na ang Ceres Mart sa Ceres North Terminal bangud wala ini nakabayad sang renta humalin sang nagbukas ini sang Hulyo 2015.
Apang suno naman kay Emily, ang lugar kun sa diin nagatindor ang Ceres Mart ang ginapanag-iyahan sang VTI nga kun sa diin indi stockholder ang iya iloy.
Dugang pa sini nga nahisugtan sa family meeting nga pwede gamiton ang lugar sang libre.
