BACOLOD CITY – Nagpadulong sa police station ang mag-utod nga babayi nga Yanson matapos nga wala makasulod sa main office sang Yanson Group of Bus Companies sa Barangay Mansilingan, Bacolod City.
Kaina sang udto, nagdangop sa Bacolod Police Station 7 sanday Emily kag Ma. Celina Yanson-Lopez bangud wala sila nakasulod sang nagkadto ang mga ini sa main office mga alas-10:20 kaina sang aga apang wala sila ginpasulod sang gwardiya.
Pasado alas-11:00 sang udto, nag-abot si Ma. Celina Yanson-Lopez apang ginpunggan man ini.
Suno sa mga gwardiya, santo ini sa mando ni Leo Rey nga presidente karon sang Yanson Group of Bus Companies apang ginkudeta sang faction sang duha ka mga babayi sang Hulyo 7.
Si Emily ang corporate secretary kag pinuno sang administrative section sang Vallacar Transit Inc. samtang si Celina naman ang finance officer sang kompanya.
Suno kay Emily, kinahanglan sang kompanya ang ila serbisyo bangud may mga papeles nga sila ang signatory.
Suno naman kay Celina, ginhambal sang mga gwardiya nga wala nila nasuksok ang bag-o nga ID sang kompanya gani nga ginpunggan sila nga makasulod.
Apang, panindugan sini nga wala sang dapat nga magpugong sa ila bangud tag-iya man sila sang kompanya.
Panawagan nanday Emily kag Celina kay Leo Rey kag sa ila iloy nga si Olivia Villaflores Yanson, indi kuntani pagdalahigon ang mga empleyado sa ila nga away.
Sa pihak sini, wala gid nagtuyo nga magtawag ang duha kay Leo Rey agud magpamangkot kun ngaa wala sila ginpasulod.
Kaangot sini nagpaathag ang abogado ni Leo Rey nga si Atty. Gerry Llena.
Suno sa abogado, nagaapelar ang kampo ni LRY nga indi anay magsulod sa main office ang Yanson Fantastic 4 kag ang mga empleyado nga nagasuporta sa ila bangud mainit pa ang sitwasyon sa lugar.
Suno kay Llena, ginasiguro lang nila ang safety kag seguridad sang mga empleyado bangud may mga bagay nga posible indi makontrol ilabi na nga daan nga may mga gamit kag dokumento nga nagkaladula matapos nga mare-install ang Armored Guards Negros Security Agency (AGNSA) .
Nagapangayo ang ila kampo sang pasaylo sa masobra 600 ka mga empleyado nga wala nakasulod sa trabaho.
Pasalig ni Llena nga wala sang mangin problema sa ila nga sweldo.
