Ginalauman sang alkalde sang ciudad sang Bacolod nga mamensyunar sang presidente sa patigayunon nga State of the Nation Address (SONA) sa Lunes, Hulyo 22 ang housing project nga ginpatukod sa ciudad sang Bacolod.
Sa interview sang Bombo Radyo Bacolod kay Bacolod City Mayor Alfredo ‘Albee’ Benitez, ginahulat nalang ang PAGIBIG para sa pagproseso sang nagakaigo nga mga rekisitos agud nga maaward na sa mga beneficiaries ang housing unit.
Madumduman nga wala mabisitahan ni President Ferdinand ‘Bongbong’ Marcos Jr. ang housing project sa relocation site sa Purok Arao sang tinalikdan nga bulan sang ini ang nagpadulong sa ciudad sang Bacolod bangud nga wala pa nakumpleto kag natapos ang mga kinahanglanon antes nga maturn-over ang housing units.
Nahibaluan nga napresentar na ang apat ka buildings sang Yuhum housing nga may 293 assigned units kag tatlo ka model units.
Una naman nga igaturn-over sa mga beneficiaries ang Building 1 kag 2 nga may kabug-usan nga 64 ka units kag ang kada unit ang may apat ka panalgan.
Samtang ang Building 3 kag 4 ang padayon nga ginaubra.
Ginahulat nalang sa karun nga matapos sang mga beneficiaries nga matapos ang mga rekisitos para sa turn over.
