BACOLOD CITY – High spirit ang mga players nagikan sa Negros Occidental nga tiglawas sang Asia-Pacific region sa majors division sang Little League Softball World Series nga patigayunon sa Oregon, USA subong nga semana.
Ang torneyo nga pasakupan sang mga atleta nga naga-edad 11 tubtub 12 anyos ang patigayunon sa Portland, Oregon humalin Agosto 9-16 kag ini ang pakigbahinan sang napulo ka mga rehiyon sa bilog nga kalibutan.
Alas 8:10 kaina sang aga, nagbiya sa Ninoy Aquino International Airport ang 12 ka softball players kaupod ang tatlo ka coaches kag lima ka opisyal sang Department of Education padulong sa Tokyo International Airport para sa ila nga flight karun sa hapon.
Wala nagapromisa ang Negros Occidental Little League majors apang tinguhaan sang mga ini nga makabawi kasunod sang pagkalutos sang seniors team sa championship match sang World Series sa Delaware, USA kaina sang kaagahon.
Sa exclusive interview sang Bombo Radyo kay Adolf Aguilar, regional sports coordinator sang DepEd Negros Island Region, ginpahayag sini nga ‘in high spirit’ kag highly optimistic ang mga Pinay matapos ginlantaw ang magulang nga mga softball players batok sa Delaware District 3 Little League.
Aminado si Aguilar nga nasubuan ini sa resulta sang hampang apang gin-athag sang DepEd official nga wala sang pressure sa majors team nga kuhaon ang kampeonato bangud silver medalist lamang ang seniors team.
Suno diri, handa na ang Philippine team sa una nga matches sa Pool B sang torneyo kaupod ang softball teams nagikan sa Indiana, USA; Puerto Rico; Texas, USA; kag ang host team nga Oregon District 4.
