Gin-abduct sang lima ka armado nga kalalakin-an ang isa ka anay police officer samtang yara ini sa isa ka hotel sa syudad sang Bacolod, Biyernes Santo sang udto.
Antes pa man ginkuha sang mga armado ang anay pulis, gindis-armahan nila ang gwardiya kag ginpapungko sa sulod kag gin-paandaman nga indi na magpasilabot samtang ginhal-id naman sa sagwa sang hotel ang iya nga armas nga ginkuhaan pa sang bala kag gintutukan ang tanan nga mga staff sang hotel nga yara sa idalom.
Sa pagpangusisa sang Bombo Radyo Bacolod, nagatambong sa family reunion sa Metro Inn si retired Police Major Lito Pirote sang Barangay Villamonte, Bacolod City sang natabo ang insidente.
Manugguwa na kuntani si Pirote agud magpadulong sa lugar sa diin nagahulat ang iya pamilya para sa pictorial sang hinali na lang nagsulod ang lima ka lalaki sa inn kag gin-pwersa ang anay pulis nga mag-upod sa ila.
Ang armado nga mga persona ang may bitbit nga malaba nga armas, naka-bonnet, naka-suksok sang bullet proof vest kag lunsay naka-itom nga panapton.
Nagbalibad ang biktima nga mag-upod rason nga ginlampusan siya sang armas sa kamot.
Sang yara na sa gwa sang hotel, nanghawid pa si Pirote sa salsalon sa entrance rason nga ginlampusan sang tubo ang iya tiil.
Dali-dali nga ginhakwat sang mga suspetsado ang anay pulis kag ginpasakay sa isa ka puti nga van.
Padayon sa karun ang imbestigasyon sang Bacolod City Police Office tuhoy sa adbuction.
Samtang, nag-paiway naman nga maghatag sang pahayag ang pamilya sini.
Si Pirote ang nagpadulong sa syudad sang Bacolod upod ang iya pamilya gikan sa Manila kag nag-check in kahapon sa nasambit nga hotel agud magselebrar sang ila family reunion.
Ang pangalan sang anay pulis ang nalakip sa drug matrix nga ginpagwa ni Presidente Rodrigo Duterte sang October 2018.
Santo sa listahan, kaupod ni Pirote nga ginaalegar imbolbado sa illegal drug trade sanday dismissed Police Col. Eduardo Acierto kag apat nga iban pa.
Enero 24 subong nga tuig, ginpasakaan sang kaso kriminal kag administratibo si Pirote kag 49 ka iban pa may kaangtanan sa shabu shipment nga nagabalor P11 billion sang August 2018.
Si Pirote ang na-assign sadto sa Police Regional Office Central Luzon apang sang ginpagwa ni Duterte ang drug list, gin-recall ini sa Campo Crame.
