10 ka mga Barangay sa Bacolod City ang may katubuhan nga apektado sang Red-striped Soft Scale Insect (RSSI).
Madumduman nga ginpaidalom na sa State of Calamity ang Bacolod City bangod sa RSSI infestation.
Sa interview sang Bombo Radyo Bacolod kay Bacolod City Councilor Thadeus “Thaddy” Sayson, chairperson sa Committee on Agriculture and Fisheries, masobra 3,000 hectares ang total planted areas sang tubo sa Bacolod City, kun sa diin 65 percent na ukon masobra 2,000 hectares ang nahalitan sang RSSI.
Sa assessment sini, ang kahalitan ang nagadangat na sa balor P100 million tubtob P200 million.
Kalabanan sa mga apektado ang named barangays, samtang wala naman sang nahalitan sa mga coastal barangay.
Ang mga apektado ang ginalakipan sang Brgy Alangilan, Bata, Cabug, Estefania, Granada, Felisa, Mandalagan, Mansilingan, Sum-Ag, kag Vista Alegre.
Sa karun padayun pa nga ginavalidate sang Sugar Regulatory Administration ang numero sang mga apektado.
Ang hatagan sang bulig, financial man ukon sa iban nga pamaagi, ang indi lamang sugarcane planters, kasubong man ang mga workers.
Suno kay Sayson, indi pa sini maseguro kun pila ang balor nga ihatag bangod ini ang nakadepende sa pondo sang Department of Agriculture kag Department of Social Welfare and Development.
