BACOLOD CITY-Dakop ang napulo ka mga estudyante sa kolehiyo kag unibersidad nga nagasuyop sang marijuana sa isa ka convenient store sa La Salle Ave., Barangay Villamonte ciudad sang Bacolod kahapon.
Sa interview sang Bombo Radyo Bacolod kay P/Lt. Rondyl Tapang, hepe sang Police Station 4, may nagreklamo nga mga pumuluyo nga may yara sila sang napanimahuan nga lain nga baho nga indi kaangay sang sigarilyo.
Gilayon naman nga nagresponde sa lugar ang kapulisan kag akto nga nadakpan ang isa sa napulo ka mga kalalakin-an nga naga-uyat sang isa ka roll sang dahon sang marijuana kag isa pa ka dried marijuana leaves.
Suno kay Tapang, nagabug-at tanan sang 2.7 grams kag may street value nga P891 ang narekober nga marijuana.
Dugang pa sang hepe nga siyam lamang ang nagpositibo sa drug test samtang ang isa nga nadakpan sa akto nga naga-uyat sang marijuana ang negatibo.
Lunsay magapangatubang sang kaso ang napulo ka mga estudyante nga yara na sa legal nga edad.
Hungod naman nga wala ginhingadlan ni Tapang ang mga nagkaladakpan.
