BACOLOD CITY – Padayon nga nahunong sa lock-up cell sang Police Station 4 ang driver sang pick-up nga nagbunggo-patay sa lalaki nga gin-alegar nag-carnap sang motorsiklo sini sa Dalan Burgos, Purok Paho 2, Camingawan, Brgy. Estefania.
Suno kay Police Senior Insp. Elmer Bonilla, hepe sang station 4, magapabilin sa ila kustodiya ang suspetsado nga si Jayson Bryle Sia, 23-anyos, pumuluyo sang Barangay Villamonte.
Sa karon nagahulat ang kapulisan sa desisyon sang pamilya sang biktima nga si Bryan Chavez, 26-anyos, pumuluyo sang Purok Cagaycay, Barangay Dos, ciudad sang Bacolod, kun magapasaka ang mga ini sang kaso.
Apang kun magtakop na ang reglementary period of detention kag indi sa gihapon ini mapasakaan sang kaso, gilayon ini nga hilwayon sang kapulisan.
Samtang, padayon nga ginausisa sang kapulisan ang profile ni Chavez bangud may posibilidad nga ini ang nagapanaka-saka sang mga puluy-an sa Villa Angela kag Barangay Estefania.
Ginpahayag naman ni Sia sa interview sang Bombo Radyo nga igapasulod na kuntani sini ang motorsiklo sa ila nga balay apang samtang nagakuha ini sang lyabe sa gate, hinali gintaban ni Chavez ang motor.
Ginlagas niya ini sakay ang Isuzu D-Max sang iya amay kag iya nasumalang si Chavez sa Bangga Trinity kag iya ini ginlagas.
Ginaserbatuhan sini ang motor apang padayon ini sa paghuyab tubtob nga hinali ini nagpreno rason nga iya gid ini nadalasa kag napatay.
