Kun may mga ginikanan nga indi luyag nga mapalayo sa ila bata apang kinalain naman ang natabo sa pulo ka tuig nga bata nga lalaki nga ginbilin sang iya ginikanan sa airport matapos madiskubrehan nga expired ang iya passport.
Suno kay Lilian Limasin, air traffic controller sa El Prat Airport sa Barcelona, samtang naga-handle ini sang departure sang eroplano nga padulong sa Casablanca, Morocco, nakabaton siya sang emergency meesage nga i-hold anay ang departure.
Makalipas ang pila ka minutos, nakit-an sang mga pulis ang bata nga lalaki nga nagalibot sa terminal kag nanugid nga ginbayaan siya sang iya ginikanan.
Nag-emergency call ang airport para sa ginikanan apang wala sang may nagpalapit.
Ginpamangkot sang mga staff ang bata angot sa iya ginikanan kag didto nahibaluan nga nakasakay na sa eroplano ang iya iloy kag amay.
Kasunod sini nagrequest ang Spanish Civil Guard nga i-hold ang byahe sang eroplano agud masolbar ang problema.
Sa pagpamangkot sang kapulisan sa mga ginikanan, ila ginpahayag nga luyag nila magbakasyon sa Morocco kaupod ang duha nila ka bata apang sa pagtskeyar sang ila dokumento, didto lang nila nahibaluan nga expired na ang passport sang magulang nila nga bata.
Imbes nga ikansela ang ila bakasyon, ginbilin nila ang bata sa airport kag nagtawag sa ila pamilya nga sugaton ini bangod nagahingagaw sila sa ila flight.
Suno sa air traffic controller wala sang abnormality sa ginhimo sang ginikanan apang wala nakumporme diri ang kapulisan.
Ang mag-asawa gin-akusahan sa pag-abandona sang ila 10 ka tuig nga bata kag pagpadelay sang flight.
