Iga-suspendiron sang Land Transportation Franchising and Regulatory Board (LTFRB) Region VI ang 10 ka ceres bus units sang Vallacar Transit Incorporated nga may rota Maao-Bacolod.
Suno sa Regional Director sang LTFRB – Region 6 nga si Richard Osmeña, suspendiron ang 10 ka units sa sulod sang 30 ka adlaw kag pa-idalumon sa imbestigasyon ilabi na sa natabo nga pag-katumba sang isa na naman sa ceres sa Purok Kapayas, Barangay Pacol sa syudad sang Bago kahapon sang udto sa diin isa ang patay samtang 41 naman ang pilason lakip na ang driver kag ang konduktor.
Apang ginpahayag man ni Osmeña nga pwede sa gihapon maka-gawad sang special permit ang kompaniya sa pag-suspendir sang napulo nila ka ceres.
Samtang, padayon sa gihapon nga naga-panugyan ang regional director sa tanan nga mga drivers kag konduktor nga antes mag-biyahe, sekyaron gid ang palibot sang bus, ilabi na ang break sini kag likawan ang over speeding.
Importante gid suno sa iya ang safety sang mga pasahero ilabi na subong nga semana santa rason nga pirmi man sini gina-pahanumduman ang mga pasahero nga kun may makita sila nga mga drivers kag konduktor nga naga-pasaway, mahimo ini nila kuhaan sang laragway kag ireklamo sa talatapan sang LTFRB Region VI.
