Mga Kabombo ano ka bala ka loyal sa imo trabaho?
Ang isa ka lalaki sa nagikan sa Brazil ang ginkilala sang Guinness Book of Records matapos nga ini ang nagtrabaho sang pila ka dekada sa pareho nga kompanya.
Si Walter Orthmann, isa ka 100 anyos nga nagikan sa Brazil ang nagatrabaho sa pareho nga kompanya humalin sang 1938.
Nag-umpisa sa pagtrabaho si Orthmann sa Industrias Renaux S.A., isa ka textile company sa Brusque, sang January 17, 1938, sang ini ang 15 anyos pa lamang.
Siya ang nag-umpisa bilang assistant sa shipping department apang sang pagkaligad sang mga tinuig, napromote ini bilang administrative assistant kag sa ulihi bilang sales manager na.
Sa tion sang iya nga 84 anyos nga kalawigon sang carreer sini , si Walter ang nagabiyahe sa bilog nga kalibutan, sang nabaton sini ang paycheck sang siyam ka nagkalain-lain nga currency denominations kag gingamit sini sa tanan nga commercial airlines sa kasaysayan sang Brazil aviation.
Sang February 2022, si Walter Offman ang official nga ginkilala sang Guinness Book of Records bilang may pinakamalawig nga pagtrabaho sa isa ka company.
Siya ang nagtrabaho sa sulod sang 84 ka tuig kag siyam ka adlaw.
Sang April 19, nagselebrar ini sang 100 years old nga kaadlawan apang wala ini sang plano nga magretire nagikan sa nagaisahanon nga kompaniya nga iya ginatrabahuan.
Ginhanduraw man sini ang iya pag-umpisa sa pagtrabaho sa Industrias Renaux S.A. (sa karun RenauxView), suno kay Orthmann, wala sang computers, ang mga telepono ang wala ginagamit sa kompaniya, samtang ang mga mensahe ang kinahanglan nga ityped sa typewriter kag kinahanglan nga imail.
Suno diri sadto wala pa sang suga sa publiko nga lugar, mahigko ang mga dalan kun sa diin madanlog kun mag-ulan.
Wala man sang running water sadto bangud tagsa ka mga balay ang may yara sang kaugalingon nga bubon.
Aminado man si Orthmann nga ang pagtrabaho sa karun nga panahon ang mas mahapos na.
Ang kinahanglan mo lamang sa karun ang mobile phone kag internet connection kag mahimo kana makahimo sang business bisan diin nga bahin sang kalibutan.
Ginpasalamatan man sini ang teknolohiya nga makapadayon ini sa pagtrabaho kag indi na ini kinahanglan nga magbiyahe indi kaangay sa nakaandan nga ginahimo sini.
Nagpanugyan man ini kun paano magdugay sa trabaho, ginpahayag sini nga indi kinahanglan magpangakig, ubrahon ang trabaho sang malipayon kag himuon ang luyag nga himuon.
Suno pa kat Orthmann nanamian ini sa pagtrabaho bangud wala ini sang kaaway kag dapat kalmahan ang pagpangabuhi.
Suno pa diri ang kabuhi ang malipas lamang diri sa kalibutan gani dapat nga ienjoy naton kag himuon ang nagakadapat.
