Yara na sa estable nga kondisyon ang 11 anyos nga bata nga babayi nga ginkastigo sang iya iloy kag katiyuan sa ciudad sang Talisay, apang ini ang kinahanglan pa nga ipaidalum sa CT Scan.
Sa interview sang Bombo Radyo Bacolod kay Dr. Vicente Iturriaga, medical doctor sa Teresita Lopez Jalandoni Provincial Hospital sa Silay City, positibo ang resulta sang glasgow coma scale nga ginpatigayon sa bata.
Ang glasgow coma scale ang nagatsekyar sa level sang consciousness sang pasyente, kalakop na ang verbal, motor kag sensory.
Apang apisar ma-estorya ang bata, ini ang drowsy ukon madasig nga ginatuyo.
Ginalantaw ni Itturiaga ang posibilidad nga apisar wala sang fracture sa bagol sang bata, ini ang mahimo nakaangkon sang internal hemmorhage gani ginahulat pa sa karun nga ini ang mapaidalum sa CT Scan.
Naluoy man ang doktor sa sitwasyon sang bata, bangod ini ang puno sang pilas, lagob kag mga bukol sa ulo, kag ini ang nakitaan man sang fracture sa kamot kag nawala nga siko.
Ginalantaw man nga itransfer sa Corazol Locsin Montelibano Memorial Regional Hospital ang bata bangod wala sang orthopedic sa ospital, nga makabulong sa naagom sini nga fractures.
Pahayag ni Iturriaga nga sa malawig sini nga pagserbisyo bilang doktor, karun lang ini nakakita sang iloy nga halos patyon na ang bata sa pagkastigo, gani kun siya lamang ang masunod, indi sini luyag nga mahatagan sang bail bond ang mga suspetsado.
Suno diri, ang bata ang ginkastigo sang iloy sini, matapos nga wala sini mapuno ang ginpasag-uban nga drum, kag ginsugo man sini nga magbulig kastigo ang duha ka tiyo kag tiya sang biktima.
Samtang ginakastigo, bangod yara sa tupad sang hinuptan nga pitbull, ang bata ang makapila man ka beses nga ginkagat sang ido.
Nahibaluan nga ginlampusan man sang mga ini sang martilyo kag tubo ang kamot sang bata kag ini ang madugay naman nga ginasakit.
Ang bata ang ginsulod pa sang iloy sa septik tank kag ginpahog nga sunugon kun ini ang magapalagyo.
Ginakahangawa ni Iturriaga nga kun nadakpan ang bata sang ini ang nagpalagyo, mahimo ini ang napatay na sang iya iloy.
Sa pag-usisa sang doktor, may mga nagapahayag nga bangod ang bata ang bunga sa paglugos sa iya iloy, gani ini ang ginapa-ukpan.
Apang ginalantaw ni Iturriaga nga indi lamang ini ang rasun, bangod mahimo nga nagagamit sang illegal nga droga ang iloy kag ang iban pa nga suspetsado.
