Patay ang 13-anyos nga lalaki matapos ginlampusan sang botelya sang red horse bangud wala ini nag-upod sang ginhagad tagay sa Barangay Paitan, Escalante City alas- 9:00 sang gab-i sang Martes, May 26.
Ginkilala ang suspect nga si alyas “Toto”, 29-anyos, lalaki, wala sang asawa kag residente sang Sitio Proper sa nasambit nga barangay.
Alas-10:50 kahapon sang aga, nagpadulong sa Escalante City Police Station ang iloy sang biktima agud i-report ang suspect nga nanglampos sang iya nga bata.
Sa inisyal nga impormasyon, nagtambong sang vigil sa ila tupad balay ang biktima kag samtang nagapungko hinali lang nga nag-abot ang suspect nga hubog kag ginlampusan sang wala unod nga botelya sang red horse ang likod nga bahin sang ulo.
Gilayon nga gindala ang biktima sa Vicente Gustilo District Hospital apang alas-7:00 kahapon sang gab-i, ini ang ginbawian sang kabuhi.
Ang suspect naman ang nadakpan sa ginpatigayon nga pursuit operation sang kapulisan alas- 11:10 kahapon sang aga sa Sitio Nangka, Barangay Jonobjonob sa nasambit nga ciudad.
