Nagpagwa ang Department of Labor and Employment (DOLE) sang panibag-o nga advisory nga nagamando nga dapat magkuha anay sang work permit ang mga bata nga 15-anyos panubo, antes mag-intra sa mga public entertainment ukon information projects, kalakip ang paghimo sang content para sa social media.
Sa idalom sang Labor Advisory No. 12, Series of 2026, liwat nga ginpaathag sang DOLE nga ginadumilian sa idalom sang Republic Act No. 9231 ang pagtrabaho sang mga bata nga wala pa naglab-ot sa edad nga 15-anyos.
Apang, may mga exception kaangay na lamang kun ang bata ang yara sa idalom sang pagdumala sang mga ginikanan ukon legal guardian kag mga kapamilya lamang ang kaupod sa content, ukon importante ang partisipasyon sang bata sa isa ka public entertainment ukon information project.
Sa anuman nga nasambit nga sitwasyon, kinahanglan gihapon nga magkuha sang work permit naggikan sa DOLE.
Sakop sang advisory ang mga programa kag produksiyon sa TV, radyo, pelikula, teatro, print, internet, pati man ang content sa streaming platforms, social media, mga vlog, digital advertisements, mga web series, podcasts, educational content, kag iban pa nga digital media.
Ginapahanumdoman man sang DOLE ang mga ginikanan, legal guardian, kag mga employers nga sigurohon nga ginasunod ang layi batok sa child labor kag ang mga patakaran agud maproteksyunan ang kinamatarong sang mga kabataan.
Ginhikayat man sang ahensya ang publiko nga i-report ang mga posible nga nagalapas diri para sa nagakaigo nga imbestigasyon kag tikang.
