Mas nagdamo pa gid ang numero sang banwa kag ciudad sa probinsya sang Negros Occidental nga nahalitan sang fall army worms.
Sa datos sang Office of the Provincial Agriculturist, as of July 5, 15 na tanan ka LGU’s ang apektado nga ginalakipan sang banwa sang Moises Padilla, Binalbagan, Candoni, Ilog, Hinobaan, Isabela, La Castellana, Murcia, Cauayan, kag ciudad sang Himamaylan, Kabankalan, Bago, Escalante, Silay kag Sagay.
Kalabanan sa mga pananom nga nahalitan amo ang mais apang sa ciudad sang Himamaylan, may narekord nga apektado man ang ila pananom nga tubo.
Sa kabug-usan, 75 ka mga barangay ang nahalitan, 1,429 ka mga mangunguma ang apektado kag 923.5 hectares nga pananom sang mais lakip na ang tubo ang naapektohan.
Suno kay Negros Occidental 5th District Congressman Dino Yulo, nagbisita sa probinsya ang mga experts gikan sa University of the Philippines Los Baños (UPLB) para tun-an kun paano matapna ang pagduging sang Fall Army Worms.
Suno diri, ginahulat pa ang resulta sang pagtuon, apang nalakip sa rekomendasyon amo ang paggamit sang lain nga klase sang chemical para i-spray sa mga pananom.
Ginalantaw man ang paggamit sang Biological control kun sa diin may yara sang sahi sang insekto nga gamiton para magpatay sa army worms.
