164 tanan ka mga wanted persons ang naaresto sa ginpatigayon nga 24-Hour Simultaneous Law Enforcement Operations sang Negros Occidental Police Provincial Office (NOCPPO) sang Agosto 30.
Sa interview sang Bombo Radyo kay Police Lt. Judesses Catalogo, tagpamaba sang NOCPPO, ang nasambit nga aktibidad ang ginpatigayon bilog nga adlaw sang Agosto 30 kun sa diin ginserbehan sang warrant of arrest ang mga wanted persons sa nagkalain-lain nga police stations sa probinsya.
Sa 164 ka mga nagkaladakpan, walo ang ginakabig nga most wanted person kag nalakip sa Top 10 samtang 156 naman ang other wanted persons.
Suno kay Catalogo, ginmobilize sang 31 ka mga city kag municipal police stations, duha ka mga mobile force companies kag Provincial Intelligence Unit sang NOCPPO ang ila tagsa-tagsa ka mga tracker teams para sa isa ka adlaw nga operasyon.
Ang Victorias City Police Station ang nagpanguna sa may pinakamadamo nga naaresto matapos nakadakop sang 24.
Ini ang ginsundan sang Bago City Police Station nga may naaresto nga 16 ka mga wanted persons kag Escalante City Police Station nga nakadakop sang 11.
Ang Isabela, San Carlos kag Sagay PNP naman ang nakaaresto sang tag walo ka mga wanted persons.
Ang nasambit nga mga police station ang nalakip sa anum nga nagpanguna sa nasambit nga aktibidad.
Ang accomplishment sang NOCPPO ang 70 porsyento sang kabug-usan nga numero sang wanted persons nga naaresto sang Police Regional Office 6 sa nasambit nga petsa.
