Patay ang 17 anyos nga bata nga babayi matapos gin-alegar linampusan sang tubo sang kaugalingon nga amay kaina alas 09:50 ang takna sang aga, Marso 09, 2026 sa Fortuneville Subd., Brgy. Rizal, Sagay City, Negros Occidental.
Ginkilala ang biktima kay Precious Herry Balicuatro, 17 anyos samtang ang suspek amo si Joedin Braza, 41 anyos, kasado, Tricycle Driver, kag lunsay mga residente sang Fortuneville Subdivision, Barangay Rizal, Sagay City, Negros Occidental.
Sa interview sang Bombo Radyo Bacolod kay Police Lt. Col. Alvimar Flores, Chief of Police sang Sagay City Police Station, ang biktima ang pakadto na sa eskwelahan antes pa man natabo ang krimen.
Suno kay Flores, may yara na nga daan sang indi pag-instindihanay sa tunga sang amay kag sang biktima.
Ang suspek kag ang biktima ang nagapuyo sa isa ka compound apang ang bata ang nagatulog sa balay sang iya nga grandparents kag sa pamilya sang iya amay.
Ang iloy kag amay sang bata ang bulagay na kun sa diin ang iloy ang yara sa karun sa Cebu.
Suno sa hepe, bangud nga separado na ang mga ginikanan sang biktima ginapahayag nga gab-i na ini nagapauli bangud nagalagaw ini.
Masami man nga nagabaisay ang mag-amay.
Suno kay Flores, sa pagpangusisa sini kag ginpahayag sang paryente sang suspek nga wala ini makatulog sa sulod na sang isa ka semana.
Ginapahayag man nga sadto may yara ang suspek nga ginatumar nga bulong para sa depression.
Kaina sang aga, hinali lang nga ginbutong sang suspek ang biktima kag gindala sa kwarto sini nga yara man sa sulod sang compound.
Nagsinggitan ang 17 anyos nga nabatian sang lolo.
Gilayon man ini nga nagpadulong sa Sagay City Police Station.
Nagresponde man gilayon ang mga kapulisan kag pag-abot sa lugar wala ang mga ini sang may nabatian nga tingog.
Ginpwersa sang mga police ang nasambit nga kwarto kag nakita ang biktima nga nagahigda sa kama samtang nagapaligo sang kaugalingon nga dugo.
Ang suspek nga mismo amay sini ang nagapungko man sa kama kag nagakaurungan.
Gindala pa sa ospital ang biktima apang gindeklarar nga dead on arrival.
Nakaagom sang pilas sa ulo ang menor de edad.
Samtang ang suspek ang yara na nakahunong sa Sagay City Police Station.
Ginalantaw nga mahimo ginsabat sang biktima ang amay sini kag naaburido ini rason nga ginlampusan niya ini sang tubo.
Ginapreparar naman sang mga kapulisan sa Sagay City ang mga dokyumento agud nga ipasaka ang kaso batok sa suspetsado.
