Nakagwa na sa ospital ang 18 anyos nga lalaki matapos nga gintublukan sang insecticide sang 15 anyos nga babayi nga luyag sini nga bulagan sa Brgy. Bunga, banwa sang Salvador Benedicto, Negros Occidental.
Sa interview sang Bombo Radyo kay Punong Barangay Romeo Mollenido, nag-message ang babayi sa lalaki sang Miyerkules para magkitaay sa lugar malapit sa isa ka buluthuan para mag-istorya.
Ginhambalan sang lalaki ang babayi nga untaton na nila ang ila relasyon kag nagpasugot man diri ang babayi.
Sang naglisensya ang lalaki para magpauli na, nangayo ang babayi sang ulihi nga hakos, apang paghakos, gin-injectionan sini ang liog sang biktima sang insecticide nga ginbutang sini sa syringe.
Matapos ang pila ka minutos, nakabatyag sang paglain sang pamatyag ang lalaki, kag naglingin ang ulo sini kag nagsululuka.
Gilayon man nga nagbakal ang babayi sang gata kag ginpa-inom sa lalaki, apang wala ini naumpawan kag gindala na lang sa ospital kun sa diin ini gin-admit.
Suno kay Mollenido, may settlement na sa duha ka bahin kag ang pamilya sang babayi ang magabayad sang gasto sa pagpa-ospital sang lalaki.
Nahibaluan naman nga ginsunod lamang sang babayi ang ginhimo sini sa nakita nga video sa Youtube.
Pahayag ni Mollenido, isa pa lamang ka bulan nga magka-relasyon ang duha kag wala na sang plano pa ang lalaki nga magbalik sa babayi.
