195 ka mga Purok ang gindeklarar nga red zone ukon fire zone sang Bureau of Fire Protection (BFP) – Bacolod.
Sa interview sang Bombo Radyo Bacolod kay Councilor Psychee Marie ‘Pao’ Sy, chairperson sa Committee on Fire, Social Defence and Disaster sang Sangguniang Panlungsod, ginduso sini nga magluwas sa mga landline numbers sang Bacolod City Fire Station, sila ang may-ara man sang macontact nga cellphone numbers sa tion sang emerhensya.
Ini bangod madamo ang nagaangkon sang kabudlayan sa hotline number, kun ipaanggid sa cellphone number kun sa diin mayorya sa mga pumuluyo ang may access.
Samtang, plano naman nga I-assess ang mga lugar nga natumod nga fire zone agud makakuha pa sang dugang nga data kag makahimo sang mga plano agud malikawan ang sunog.
Isa sa plano sang mga ini amo ang paghamtang sang fire extiguisher sa nasambitan nga mga purok agud may magamit sa pagpalong samtang gamay pa lamang ang kalayo.
Si Fire Supt. Jenny Mae Masip, fire marshal sang Bacolod City Fire Station ang padayun man sa pagpatigayon sang lectures sa mga Barangay kag Purok agud may ihibalo ang mga pumuluyo sa dapat himuon sa tion sang sunog, samtang ginaduso man nga makapatigayon sang mga fire drills.
Ini kasunod sang mga dalagkuan nga sunog nga nagluntad sa Purok Kagaykay, Barangay 2 nga naghalit sa 83 ka balay kasubong man sa Purok King Fisher A, Barangay 16 nga nakahalit sa 15 ka balay kun sa diin nadulaan sang kabuhi si Purok President Alejandre Tiad.
Bangod kalabanan sa mga fire zone ang squatters area, isa sa ginatun-an nga mahatagan sang solusyon ang magutok nga dalan kun sa diin mabudlayan sa pagsulod ang mga bombero.
