Ginpatigayon kahapon, Abril 25, sang sports summit sa STI West Negros University antes ang pormal nga pagbukas sang 1st Negros Island Private School Sports Atheletic Association meet subong nga adlaw, Abril 26.
Sa interview sang Bombo Radyo Bacolod kay Dr. Mark Molina, 2nd Vice President National PRISAA, antes ang official nga pagbukas sang pahampang, nagpatigayon sila sang sports summit kaupod ang mga opisyales nagikan sa Philippine Sports Commission, STI West Negros University kag coaching staff sang mga delegado.
Suno kay Molina, ang nasambit nga pahampang ang pasakupan sang 12 ka mga private schools nagikan sa Negros Occidental kag Oriental.
Ang mga eskwelahahan ang ginalakipan sang STI West Negros Univesity; University of Negros Occidental Recoletos, John B. Lacson Colleges Foundation; University of Saint La Salle; La Consolacion College Bacolod,Colegio San Agustin Bacolod,VMA Global College sa ciudad sang Bacolod; Colegio De Sta. Ana De Victorias sa ciudad sang Victorias; North Negros College sa Sagay City; Southland College sa ciudad sang Kabankalan sa Negros Occidental samtang ang sa Negros Oriental naman ang ginalakipan sang Foundation University Dumaguete Colegio De Santa Catalina De Alejandria.
Suno kay Molina, nakita sini sadto pa sang 2017 nga madamo sang mga kabataan ang may yara sang ikasarang nga makacompete sa national stage nagikan sa Negros Island gani ginduso sini ang pagpatigayon sang Negros Island Private School Sports Atheletic Association ukon NIPRISAA.
Suno diri, tinutuyo sang nasambit nga kompetisyon amo ang makatukib may abilidad nga atleta nga magarepresentar sang Negros Island Region sa national competition sang hinampang ilabi na madamo sa Higher Education Institution sa Negros nga may potensyal.
May yara sang 14 ka sahi sang hinampang kag pila diri ang swimming, basketball kag madamo pa sang iban kag ini ang magaumpisa subong Abril 26 tubtob sa Abril 30.
Dako ang pagpasalamat ni Molina sa tanan nga mga delegado nga nagpasakop sa labing-una NIPRISAA nga patigayunon sa ciudad sang Bacolod.
Preparasyon man ini para sa national games nga patigayunon sa Albay.
