Desisyonan pa sang Land Transportation Franchising and Regulatory Board – Negros Island Region (LTFRB-NIR) kun dayunon ukon ireschedule na lamang ang natalana nga payout sang financial subsidy sa mga taxi drivers.
Sa interview sang Bombo Radyo Bacolod kay LTFRB NIR Director Atty Gerry Llena, kuntani sa Mayo 28 ang ila nga schedule sang payout, nga magadungan sa payout sang DSWD para sa Transport Network Vehicle Service (TNVS).
Suno kay Llena, tun-an pa nila kun padayunon ang payout sa nasambit nga schedule agud isa na lamang ka adlaw.
Dugang pa niya nga maayo man sa mga drivers kun parehas nga makuha ang ayudad sa duha ka ahensya.
Apang ginalantaw man sini ang posibilidad nga magsala-sala ang mga drivers sa venue sang payout.
Madumduman nga agud solusyonan ang reklamo sa init sang payout area, sila ang una nagpatigayon sa malls para mas hilway sa mga drivers.
Apang indi sa parehas nga malls magapatigayon sang payout ang DSWD kag LTFRB gani ini ang mahimo makatuga agud magtalang-talang ang pila ka driver.
Sadto yara sa 800 tubtob 900 ang ila nga nacater sa isa ka adlaw, kag subong plano nila nga pasakaon pa ini sa 1,000 tubtob 1,200 sa isa ka adlaw.
Ginalantaw man ni Llena ang pagsaylo sang schedule sang payout sa kasunod nga adlaw.
