Magapanagtag sang P5,000 fuel assistance para sa mga Transport Network Vehicle Service (TNVS) sa ciudad sang Bacolod sa Huwebes, Mayo 28.
Ini ang pangunahan sang Department of Social Welfare and Development sa koordinasyon sa Bacolod City Government, kag Department of Social Services and Development.
Suno kay Bacolod City Mayor Greg Gasataya, sa inisyal, may kapin 3,500 nga yara sa listahan sa bilog nga Negros Island Region, kag wala pa mahibaluan kun pila ang sa Bacolod City.
Pahayag sang alkalde, nga dapat mahatag na ang listahan antes ang Miyerkules, agud ila nga marelease ang listahan kag mapahibalo sa mga drivers nga kwalipikado.
Suno diri, ang listahan ang ginsumiter sang kompanya.
Suno kay Mayor Greg, ang ila na lamang gina-asikaso amo ang fuel assistance para sa mga taxi drivers bangod ang listahan ang magagikan sa Land Transportation Franchising and Regulatory Board (LTFRB).
Pahayag sang alkalde nga ikumparar pa nila ang mga listahan, bangod ang ginrecord sang ciudad amo ang lista sang mga drivers, apang ang record sang LTFRB ang nakadepende sa prangkisa.
