Tatlo ka local officials ang patay sa separado nga shooting incident sa Guihulngan City, Negros Oriental, Huwebes sang kaagahon.
Ang mga nagkalamatay ang ginalakipan sang opisyal sang Department of Education Division of Guihulngan City, utod sini nga school principal, kag isa ka punong barangay.
Suno sa Negros Oriental Police Provincial Office, halos isa lamang ka oras ang antad sang duha ka shooting incident.
Alas-12:30 sang kaagahon, ginpatay sang armado nga mga lalaki ang mag-utod nga Aradale Bayawa, chief sang Curriculum Implementation Division sang DepEd Division of Guihulngan City kag iya utod nga si Arthur Bayawa, assistant principal sang Guihulngan National High School – Special Science Department.
Ginguba sang mga suspetsado ang padlock sa main door sang balay sang mag-utod sa Barangay Hibaiyo rason nga sila ang nakasulod.
Ala-1:40 naman sang kaagahon, ginpatay man sang armado nga mga lalaki si Punong Barangay Romeo Alipan sa ila nga balay sa Brgy. Poblacion, Guihulngan City.
Si Alipan ang punong barangay sang Barangay Buenavista apang may balay ini sa Larena, Brgy. Poblacion sa diin siya nagtulog kagab-i.
Gilayon nga nagpalagyo ang mga suspetsado sakay sa wala pa natumod nga getaway vehicle.
