BACOLOD CITY-Patay ang duha ka mga kabataan samtang tatlo naman ang nakaluwas sang nalumos matapos nagpaligo sa ginahimo nga drainage sang isa ka private property nga may tubig-ulan sa Purok Star Apple, Barangay 27 ciudad sang Bacolod kahapon sang hapon.
Ginkilala ang mga napatay nga sanday Adrian Bagundol, 10-anyos kag Robert Porcino, 6-anyos samtang gindala naman sa ospital ang duha nila ka mga kaupdanan nga sanday Edgardo Monserati Jr., 6-anyos kag Paul Soquiño, 8-anyos.
Wala naman gindala sa ospital ang isa pa nila ka upod nga anom ka tuig nga si Prince Justine bangud wala ini naglumpat sa drainage.
Suno kay Police Lt. Rondy Tapang, commander sang Police Station 4, nagapangita sang pispis ang mga kabataan sa sulod sang propiedad sang Mega World nga sakop sang Brgy. 41 kag posible bangud sang curiosity naglumpat ang mga ini sa drainage nga may tubig.
Sa pagbanta ni Tapang, posible nga nagadalom sang 6-7 ka tapak ang kadalumon sang tubig sa drainage.
Dugang pa sang commander, masami man nga ginasaway sang guwardiya ang mga kabataan nga indi magsulod sa propiedad bangud pribado ini apang posible nga wala sila natalupangdan kahapon bangud sang kapalaron sang lugar.
