BACOLOD CITY – Arestado ang duha ka mga miembro sang robbery hold-up group nga ginatudlo responsable sa serye sang kinawatay sa probinsiya sang Negros Occidental sa operasyon sang kapulisan sa Sitio Badiang, Brgy. Sum-ag ciudad sang Bacolod kagab-i.
Ginkilala ang mga naaresto nga sanday Romy Hituro, 34-anyos sang Zone 12, Brgy. Handumanan, Bacolod City kag Arnold Epogon Revera, 21, sang Hacienda Pula, Brgy. E Lopez, Silay City kag sila ang mga miembro sang Epogon robbery hold-up group.
Ginpamunuan ni Police Lieutenant Col. Leonardo Borromeo sang City Intelligence Unit (CIU) ang pag-aresto sa duha.
Suno kay Borromeo, nakabaton sila sang report tuhoy sa modus sang duha kag madugay na nila ini nga gin-monitor kag plano pa kuntani nga apply-an sang warrant of arrest.
May impormasyon ang CIU nga nagaplano ang grupo nga mag-atake na naman sa isa ka dako nga kompaniya subong nga adlaw gani ila ini nga gin-unahan.
Ginlambatan lang sa dalan sang CIU ang mga suspetsado samtang sakay sang motorsiklo kun sa diin ang bitbit nila nga mga armas kag bala ang nasulod lang sa sako.
Samtang suno kay Bacolod City Police Office (BCPO) Director Police Col. Henry Biñas, responsable ang grupo sa paghold-up sa Central Negros Electric Cooperative (CENECO) sang 2012.
Sila man ang ginapatihan responsable sa paghold-up sa isa ka distillery sa banwa sang Murcia sang damlag lang kag pagpangawat kag pagpatay sa guwardiya sang isa ka arusera sa ciudad sang Bago nagligad nga semana.
Nakuha sa paghinakop sang mga suspetsado ang M-16, tatlo ka 9mm, granada kag live ammunitions.
Suno kay Biñas, magapangatubang sang kaso nga paglapas sa RA 10591, ukon “Comprehensive Firearms and Ammunition Regulation Act” kag COMELEC gun ban.
Sa karon, priso ang duha sa Police Station 9.
