Nagdangop ang isa ka iloy sa Ipa-Bombo Ta segment sang Bombo Radyo Bacolod matapos nga wala makuha sang iya bata kag utod nga tricycle ang para sa ila nga fuel subsidy bangod wala sa ginrelease nga listahan kag wala man gincontact para sa payout.
Sa interview sang Bombo Radyo Bacolod kay Arlene Palima sang Prk Tunay, Brgy Bata, Bacolod City, ang utod sini nga si Joel Tigulo kag iya nga bata nga si Ruben Palma, lunsay tricycle drivers ang nakapalista sa ciudad sang last day sang listahanay.
Ginkuha man ang cellphone number sang mga ini kag gintugyanan nga sila ang pahibaluon na lamang paagi sa ila contact number sang schedule sang payout.
Suno kay Arlene, nakita man nila ang posting sang listahan sang mga benepisyaryo sang Mayo 25, apang wala sa listahan ang pangalan sang iya bata kag utod.
Gani, nagpinsar sila nga mahimo may masunod pa nga payout ilabi na nga last day nakaparehistro ang iya mga himata.
Apang sa pagbalik sini sa Bacolod City Government Center nakaligad nga inadlaw, ginpahibalo ini nga last day na sang payout para sa Tricycle Operators and Drivers Association (TODA) sang Mayo 25, kag wala na sang kasunod.
Ginpakumpirmar man sini sa record kun yara gid man ang pangalan sang himata, kag nakita man sa system nga sila ang nalakip sa listahan.
Ginsabat lamang ini sang nagcater nga personnel nga wala na sila sang mahimo, gani nagpadulong ini sa opisina sang Department of Social Services and Development (DSSD), apang siya ang gin-updan lang padulong sa opisina ni Bacolod City Mayor Greg Gasataya.
Wala ang alkalde, gani sekretarya lamang ang iya naatubang.
Nagbalik ini kahapon agud hibaluon kun naghulag ang iya apelasyon, apang gintindugan sang personnel nga nabalik na ang pondo.
Dugang pa sini nga sila ang wala gid man nagacontact bangod suno sa personnel, tuman na kadamo sang ila ulubrahon para icater pa ang pagcontact sa libo-libo nga benepisyaryo sang fuel subsidy.
Pahayag pa sang personnel nga indi tanan nga yara sa listahan ang mahatagan kag ginpili lamang ang makabatun sang ayuda.
Gani nagdangop na ini sa Bombo Radyo Bacolod, agud maathagan sa natabo.
